“Taulant Balla, Elbasani ty të do”, FIFA gjobit Shqipërinë për dronin në “Elbasan Arena”
Pas ndëshkimit me 150 mijë franga dhe një ndeshje pa tifozë për shkak të trazirave që shkaktuan tifozët shqiptarë në sfidën kualifikuese ndaj Polonisë, kombëtarja shqiptare ka marrë një tjetër ndëshkim nga FIFA. Komisioni i Disiplinës i Organizmit më të lartë të futbollit botëror ka gjobitur Shqipërinë me 37.500 franga për dronin e ngritur në “Elbasan Arena” gjatë ndeshjes mes Shqipërisë dhe Hungarisë në kuadër të Botërorit, Katar 2022.
Droni i cili u ngrit mbi stadium kishte një mesazh për kryetarin e grupit të Partisë Socialiste, Taulant Balla, të cilin kryeministri Edi Rama e largoi si drejtues nga ky qark duke e dërguar në Fier “Taulant Balla, Elbasani ty të do” ishte mesazhi në mbështetje të socialistit që valëvitej mbi dron, ndërsa i gjithë stadiumi shpërtheu në kor “Rama Ik”.