NEWS 5 Maj 2022, 18:46

‘Ekspertiza nuk tregon që ka vrarë veten’, flasin familjarët e 31-vjeçarit që vdiq në burg

‘Ekspertiza nuk tregon që ka vrarë veten’, flasin

Një ngjarje e rëndë ndodhi mbrëmjen e së mërkurës në Komisariatin e Kavajës, ku 31-vjeçari Ilvi Meta u gjet i pajetë.

Familjarët e tij, kanë folur ekskluzivisht për emisionin “Sot” në “Euronews Albania” dhe janë shprehur se Ilvi nuk është vetëvarur ashtu siç është deklaruar zyrtarisht, por është vrarë nga policia.

Motra e tij, Irena tha se ekspertiza mjeko-ligjore e Durrësit dhe e Tiranës nuk kanë firmosur që i vëllai i saj ka vrarë veten.

“Ekspertiza e Durrësit nuk e ka vënë firmën që vëllai ka vrarë veten. As e Tiranës nuk e ka vënë firmën. Ka ardhur trupi i vëllait në 4 të mëngjesit, duhet të vinte në 12 të natës. Nuk e di se si e kanë vënë firmën. Nuk ka ardhur ekspertiza e plotë”, u shpreh ajo.

Sipas saj, i vëllai ka qenë i arrestuar më parë dhe i kishte treguar se në komisiariat ishte një polic i cili e kishte kërcënuar.

“Ka qenë i arrestuar më parë. Më ka thënë që është një polic që i ka thënë ta kam bërë benë, vetëm po nuk më erdhi rasti që të kem në dorë. Me emër nuk e di kush është ky polic. Nuk e dimë se kush u mor me çështjen e tij, nuk kemi asnjë lloj informacioni”, tha ajo.

Ndërsa, e ëma e tij Zinie Meta tha se djalin e saj e ka vrarë policia dhe se këtë çështje duhet ta ndjekë shteti.

“Ma vranë. Megjithëse ma kapën, por ma kanë vrarë. Djali ka qenë i operuar me stomak, ma kanë vrarë. Policia. Më sollën rripin e djalit. Ato që ma kanë vrarë djalin, nuk di çfarë të them, ta shohë shteti. Unë nuk jam mësuar me vjedhje, jetoj në barake”, deklaroi ajo.

Tezja e tij, Nexhmije Dimni u shpreh se Ilvi nuk mund të ketë vrarë veten, pasi në komisariat duhet të heqësh rrobat dhe rripin, në mënyrë që të mos kesh asgjë me të cilën mund të kryesh vetë vrasje.