Nga Jungle drejt Sky”: Si V/LAB po promovon creator-ët me ekspertizë
Në zemër të Tiranës, mbi një rooftop panoramik që për një natë u kthye në një nga adresat më të komentuara online, Vatra dhe V/LAB organizuan “Through Jungle to the Sky”, një event që solli jo vetëm atmosferë, muzikë dhe networking, por edhe një mënyrë tjetër për të parë rolin e creator-ëve dhe influencer-ëve sot.
Në thelb të eventit qëndronte filozofia e V/LAB, një inkubator talentesh brenda Vatra, i fokusuar në identifikimin dhe zhvillimin e creator-ëve të rinj me ekspertizë në fusha konkrete dhe potencial për të krijuar përmbajtje autentike. Ideja nuk është thjesht ndërtimi i profileve publike, por zhvillimi i figurave që mund të krijojnë ndikim të besueshëm përmes njohurive, eksperiencës dhe identitetit të tyre profesional.
Përmes menaxhimit dhe zhvillimit të profilit publik, V/LAB synon të krijojë ura më organike mes talenteve dhe brand-eve, duke ndihmuar creator-ët të pozicionohen si ambasadorë të natyrshëm për bashkëpunime që lidhen realisht me ekspertizën dhe profilin e tyre.
Pas kësaj qasjeje qëndron eksperienca e Eri Kokona, e cila prej vitesh ka hulumtuar nga afër mënyrën si ndërtohen figurat publike dhe raporti i tyre me audiencën. Sipas këtij vizioni, publiku kërkon gjithnjë e më shumë autenticitet dhe informacion të përcjellë nga figura kompetente, ndërsa kompanitë kanë nevojë për më shumë qartësi dhe transparencë në përzgjedhjen e brand ambassador-ëve me të cilët bashkëpunojnë.
Gjatë mbrëmjes, CEO i Vatra, Gerton Bejo, u ndal te simbolika e konceptit “Through Jungle to the Sky”, duke e lidhur atë me realitetin e sotëm të komunikimit digjital.
“Jetojmë në një xhungël informacioni, ku zhurma shpesh mbulon të vërtetën. Qasja jonë është të ngjitemi drejt qiellit, drejt qartësisë dhe autenticitetit që duhet të kenë influencer-at e ditëve të sotme”, tha ai.
E konceptuar si një eksperiencë me tre etapa; instinkti i xhunglës, pulsi urban dhe vetëdijësimi qiellor, mbrëmja kulmoi me spektaklin e dronëve të realizuar në bashkëpunim me kompaninë greke Dronira, ndërsa performancat e Flo Ross, Martyr dhe R10 mbajtën ritmin e eventit deri në fund.
Përtej impaktit në rrjetet sociale, “Through Jungle to the Sky” solli në vëmendje një ide që po fiton terren: influenca ka më shumë vlerë kur mbështetet mbi ekspertizë, besueshmëri dhe autenticitet.
