Ukraina fiton Eurovision-in, vjen reagimi i parë nga presidenti Zelensky
Grupi ukrainas "Kalush Orchestra" fitoi çmimin e parë në konkursin e këngës në Eurovision në orët e para të së dielës në një shfaqje të qartë të mbështetjes për kombin e shkatërruar nga lufta.
Grupi i muzikës rap-folk, të cilit iu dha leje specialee për t’u larguar nga vendi i shkatërruar nga lufta mori 631 pikë në një shfaqje simbolike të mbështetjes publike, pas pushtimit të vendit nga Rusia.
Në fund të performancës së tyre në finale e mbajtur në Torino, grupi bëri thirrje për lutje për ndihmë ndaj Ukrainës dhe veçanërisht Mariupolit dhe zonës së uzinës së çelikut Azovostal ku ende ka të bllokuar ushtarë ukrainas dhe qytetarë.
Kënga fituese, e titulluar Sefania, fillimisht është shkruar si homazh për nënën e këngëtarit, Oleh Psiuk, por më pas u ripërdor si thirrje për shpëtimin e nënës Ukrainë.
Kjo fitore i jep të drejtën Ukrainës të organizojë shfaqjen e Eurovision për vitin 2023. Në rastin kur një vend nuk është në gjendje apo nuk dëshiron të organizojë festivalin, të drejtën e merr një vend tjetër.
Presidenti ukrainas Volodymyr Zelensky u zotua se Ukraina do ta organizojë këtë konkurs muzike. Në një publikim në rrjetet sociale ai tha se Ukraina do të sigurohet që një ditë Eurovision-i të mbahet në Mariupolin e rindërtuar.
"Guximi ynë i bën përshtypje botës, muzika jonë pushton Evropën," - u shpreh ai.