Të gjitha përgjigjet për albumin e tij, “1 Goat Për Ty” Ledri Vula i dha përballë Xheraldinës

Ditën e sotme, "N'majë t'gjuhës" pati një të ftuar shumë special. Përballë Xheraldina Vulës qëndronte Ledri Vula. Përballë mamasë së tij, reperi foli për jetën private, karrierën e albumin e ri.

Ndalur te ky i fundit, pak ditë më parë artisti publikoi albumin më të ri me titull "1 G.O.A.T Për Ty". Të gjitha këngët Ledri i ka sjellë të shoqëruara edhe me videoklipe. Dhe për këtë ka një arsye.

"Kohët e fundit po bëhen shumë albume dhe disa këngë që nuk kanë klipe edhe humbin në album. Kështu marrin vëmendjen e duhur të gjitha këngët", u shpreh Ledri.

 Kënga e parë që reperi publikoi nga albumi ishte "Përshëndetje hejter". Një rrëfim i jetës private. Por pse ishte pikërisht ajo e para?

"Kam dashur të jap një mesazh të fortë në fillim prandaj e nxorra këngën e parë. Ato të ëmblat i kam lënë për më vonë", tregoi Ledri.

Ledri është ndër ata artistë i cili gjatë karrierës së tij, çdo këngë që është realizuar, është shndërruar në hit. I pyetur se cilat këngë janë "vulat e tij", Ledri e pati një përgjigje.

"100 probleme, 1 gotë për ty, I vogël, Si baba", ishin disa nga këngët që përmendi edhe pse lista është shumë e gjatë. Dhe nuk i vejmë faj. 

Krahas bisedës së ngrohtë dhe plot humor, gjatë programit u transmetuan edhe këngë të albumit "1 goat për ty" dhe ne i shijuam shumë.